تاند ( پنجشنبه، د دلوې ۲۳) په هندوستان کې د هغه هوښیار او ځيرکه سپي د لاسته راوړنو د یادښت او قدرداني موخه مجسمه جوړه شوې چې د ٤٩ قضيو په حلولو کې يې پولیسو سره مرسته کړې وه.
د هندي رسنیو د راپورونو په حواله، د هند اترا پردیش ایالت په مظفر نگر ولسوالي کې د پولیسو په پوسته کې د یوه جرمني سپي چې د پولیسو خاص همکار وو مجسمه جوړه شوې ده.
د معلوماتو له مخې، جوړه شوې مجسمه د هغه د خدماتو په خاطر سپي ته درناوي ادا کولو لپاره جوړه شوې ده.
راپورونه ليکي، ياد ځيرکه سپی څه موده وړاندې د روغتيايې ستونزو له امله مړ شوی خو هندي پولیس یې د قدرداني او یادښت په موخه غواړي د مجسمې له لارې یادونه ژوندي وساتي.
راپورونه کاږي، ياد روزل شوي سپي ته د ASP رتبه هم ورکړل شوې وه.
راپورونه زياتوي، د مجسمې د جوړولو په مراسمو کې ځايي پولیسو د قدرداني مراسم هم ترسره کړي دي.
د پولیسو لوړ پوړي افسر ابھیشیک له رسنيو سره خبرو کې ويلي چې روزل شوی سپی په ٢٠١٤ کال کې د مظفر نگر پولیسو سره یوځای شوی و ٤٩ قضیې یې حل کړې وې.
د دغو مراسمو او د سپي مجسمې عکسونه زيات شمېر ټولنیزو رسنیو کاروونګو خپاره کړي او د پوليسو له لورې ياد ځيرکه سپي ته د درناوي مراسم يې ستايلي دي.