تاند (یکشنبه د دلوې ۱۹) افغان سرحدي ځواکونو د پاکستان د توپچي حملو په مقابل کې بالمثل عمل کړی او د پاکستاني اړخه ویشتل شویو توپونو مقابل کې یې ځوابیه بریدونه کړي.
د ننګرهار د ولایتي شورا رئیس احمد علي حضرت وايي، پاکستاني پوځیانو نن له غرمې مخکې د ګوشتې ولسوالۍ په یو شمېر سیمو راکېټي بریدونه وکړل، خو په وینا یې افغان پوله ساتو ځواکونو یې بېرته پر وخت ځواب ورکړی.
نوموړي د افغان حکومت له رهبرۍ مننه کړې چې سرحدي ځواکونو ته یې د بالمثل عمل کولو امر ورکړ او په خبره یې افغان ځواکونو د ډیورنډ کرښې په هغې غاړې د توپونو ډزې کړې دي.
هغه پر خپله فېسبوک پاڼه لیکلي: «پاکستان د افغان سولې او خاورې دایمي دوښمن دی او هر کله چې افغان ولس د ثبات په لور ګامونه پورته کړي، دوئ بیا له هرې ممکنه لارې کار اخلي چې مخنیوی یې وکړي، کله راکېټي بریدونه وکړي او کله هم نور ترهګریز فعالیتونه.»
د ننګرهار ولایتي چارواکو او سرحدي لوا تر اوسه په دې هکله څه نه دي ویلي.
د یادونې وړ ده چې د افغانستان د بهرنیو چارو وزیر نن په کابل کې د پاکستان له سفیر سره په لیدنه کې له نوموړي غوښتي چې پر افغان خاوره د پاکستاني پوځیانو له لوري د راتوغول کېدونکو توغندیو په هکله د کابل جدي اندیښنه پاکستاني چارواکو ته ورسوي.