تاند (جمعه د دلوې ۱۷) د کندهار ځايي امنیتي چارواکي وايي چې د غورک د ولسوال پر کور ځانمرګی موټر بم بريد شوی دى.
د غورک ولسوال جمعه خان وايي چې په دې پېښه کې یې د کورنۍ څلور تنه ټپيان شوي دي او د کور لويه برخه یې هم تخريب شوې ده.
بله خوا د کندهار د امنیه قومندانۍ ویاند جمال ناصر بارکزی وايي چې نن په کندهار ښار کې دوه چاودنې شوي دي.
چاودنې نن د کندهار ښار يوولسمې امنيتي حوزې اړوند په عينو مېنه کي شوې دي.
د بارکزي په خبره لومړۍ چاودنه د غورک ولسوالۍ د ولسوال پر کور شوې او دويمه چاودنه د ملکي وګړو پر موټر شوې ده.
دی وايي چې د غورک د ولسوال پر کور چاودنه تلفات نلري او د ملکي وګړو پر موټر د چسپکي ماين چاودنې دوه ملکي وګړي وژلي او درې نور ټپیان دي.
په کندهار کې د عينو مېنې ښارګوټی يو له هغه سيمو څخه ده چې د جمعې په ورځ ورته خلک د مېلې لپاره ورځي.
د يادو پېښو مسؤلیت لا تر اوسه کومې ډلې نه دی منلی.