تاند (جمعه د دلوې ۱۷) امنیتي چارواکي وايي په لوګر کې له چاودېدونکو توکو ډک یو کرولا موټر نیول شوی دی.
د ۲۰۳ تندر قول اردو ویاند ایمل مومند وایي، دغه موټر بم نن غرمه مهال د تندر قول اردو د څلورمې لوا سرتېرو د لوګر ولایت د محمداغې ولسوالۍ اړوند د «پورک» په سیمه کې نیولی دی.
دی وایي په دې کرولا ډوله موټر کې د وسله والو طالبانو له خوا چاودیدونکي توکي ځای پرځای شوي و چې د افغان ځواکونو لخوا د پلټنې پر مهال ونیول شو.
مومند وایي د موټر چلونکی له سیمې په تېښته بریالی شوی دی.
نوموړی زیاتوي، د دغه چاودیدونکو توکو په نیولو سره افغان ځواکونو د یو شمیر بې ګناه هیوادوالو ژوند وژغوره.
طالبانو بیا تر اوسه په دې هکله تبصره نه ده کړې.