تاند ( یک شنبه، د دلوې ۱۲) د متحده عربي اماراتو ټي ټېن یا لس اوره لیګ په نهمه لوبه کې ناردرن واريرز د ٣٢ منډو په توپير د ډيلي بولز لوبډلې ته ماتې ورکړه.
ډيلي بولز پچه وګټله او لومړى يې ناردرن واريرز ته د توپوهنې بلنه ورکړه.
ناردرن واريرز که څه هم کمزورى پيل وکړ خو وروسته يې چټکه توپوهنه ترسره کړه او په ټاکلو ١٠ اورونو کې يې د ٣ لوبغاړو په سوځېدو ١٣٧ منډې وکړې.
د ناردرن واریرز لپاره نيکولاس پوران د ۵ شپږيزو او ۵ څلوريزو پر مټ په ٢١ توپونو ۵۴ تر نورو ډېرې منډې وکړې.
فابين الين ٢٨ ناسوځېدلې، رومان پاول ٢۴ ناسوځېدلې او برېنډن کنګ ١٨ منډې وکړې.
د ډيلي بولز لوبډلې په ټاکلو ١٠ اورونو کې د ٧ لوبغاړو په سوځېدو یواځې ۱۰۵ منډې وکړې او د ٣٢ منډو په توپير يې ماتې وخوړه.
د دوى له لوري روي بوپاره ٣۶ رحمان الله ګربز ١۵، محمد نبي ١۵ ناسوځېدلې منډې وکړې.
د لوبې د غوره لوبغاړي جايزه واين پارنيل ترلاسه کړه.
دا په روانو لوبو کې د ډيلي بولز۳مه لوبه وه چې لومړۍ ماتې يې وخوړه خو د ناردرن واريرز ۲مه لوبه وه چې لومړۍ بريا يې خپله کړه.