تاند (شنبه، د دلوې ۱۱) کابل ښار له نن سهار تر غرمې د دوو چسپکي ماین چاودنو ښکار وو چې د راپورونو له مخې، یادو چاودنو کې ۴ تنه ملکي وګړي ټپیان شوي دي.
د کابل د امنیه قوماندانۍ ویاند فردوس فرامرز تاند ته وايي، لومړۍ چاودنه د پنځمې امنیتي حوزې اړوند د کمپنۍ پله سره نږدې رامنځ ته شوې، خو کوم چاته یې مرګ ژوبله نده اړولې.
فرامرز زیاتوي، دویمه چاودنه د څلورمې ناحیې اړوند سلیم کاروان مېنې ته څېرمه پر یو کرولا ډوله موټر پسې د چسپکي ماین له کبله رامنځ ته شوې چې په ترڅ کې یې څلور تنه ملکي وګړي ټپیان شوي دي.
د یادو دواړو چاودنو مسوولیت تر اوسه کومې ډلې نه دی منلی.
په داسې حال کې چې دې وروستیو اونیو کې د کابل ښار هره ورځ د معمول په څېر له یوې تر څلورو چاودنو ښکار وي، خو حکومت یې لا هم په مخنیوي کې پاتې راغلی دی.
د یوه بل خبر له مخې، کندهار ښار کې هم نن سهار د ملکي وګړو یو زرنج موټرسایکل د سړک غاړې ماین چاودنې ښکار شوی چې له کبله یې د یو ماشوم په ګډون د ۳ تنو ملکي وګړو ژوند د لاسه ورکړی دی.
د کندهار د امنیه قوماندانۍ مسوولین وايي چې نن سهار د پنجوايي ولسوالي اړوند “صالحانو” سيمه کې د ملکي وګړو پر زرنج موټرسایکل ځای پر ځای شوي ماین چاودنه کړې چې د یو ماشوم په ګډون یې درې ملکي وګړي وژلي دي.
امنیه قومنداني دغه راز ادعا کوي چې ماین د طالبانو له لوري د سړک په غاړه ځای پر ځای شوی وو، خو وسلوالو طالبانو بیا تر اوسه په دې اړه څه نه دي ویلي.