تاند ( جمعه، د دلوې ۱۰) د متحده عربي اماراتو په ټي ټین لیګ کې د جاوید احمدې او یمین احمدزي اړوند مراټا عربینز لوبډلې نارترن ویریرز لوبډلې ته په پنځو ویکټو ماتې ورکړه.
مراټا په دې وتوانېده چې د څلورم پړاو ټي ټېن لیګ لومړۍ لوبه په خپل نوم کړي.
دا لوبه تېر ماښام ترسره شوه چې په کې مراټا پچه ګټلې وه او ويريرز لوبډلې ته یې د توپ وهنې بلنه ورکړې وه.
نارترن ویریرز په ټاکلو لسو اورونو کې د دوو لوبغاړو په سوځېدو ۱۲۷ منډې وکړي او مراټا لوبډلې ته یې د ۱۲۸ منډو هدف وټاکه.
د ویریرز لوبډلې لپاره په توپ وهنه کې پاول ۲۲، نیکولاس ۱۹، برانډون ۲۹، او سیمونز د یوې شپږیزې او اووه څلوریزو پر مټ ترټول زیاتې ۵۴ منډې جوړي کړې.
مراټا لوبډلې ټاکل شوی هدف د پنځو لوبغاړو په سوځېدو پوره او لوبه یې وګټله.
مراټا لپاره عبدالشکور بنګش د ۵ شپږیزو او ۷ څلوریزو پرمټ ترټولو زیاتې ۷۳ منډې جوړې کړې.
د یادولو ده چې په دغه لیګ کې به ۲۹ لوبې ترسره کیږي چې هره ورځ به درې سیالۍ ترسره کیږي.