تاند ( پنج شنبه، د دلوې ۹) چک جمهوريت په افغانستان کې د ټلېکام خدماتو پراختیا سره د مرستې لېوالتیا ښودلې ده.
د افغانستان د مخابراتي خدمتونو د تنظیم اداره (اترا) وایي چې یاد هېواد دا لېوالتیا نن په کابل کې د اترا ادارې له عمومي مشرعمرمنصور انصاري سره د ليدنې پرمهال ښودلې.
د اترا مسوولان وایي، په دې لیدنه کې د یاد هېواد سفیر ایرژي بالون د ټلېکام د ودې لپاره د هېوادونو په کچه د دوه اړخیزو همکاریو پر پیاوړتیا ټینګار وکړ او وې ویلي چې، هېواد یې چمتو دی څو له افغانستان سره د فریکونسۍ غوره مدیریت، د انټرنیټي خدمتونو د کنټرول او نظارت، د پوښښ ساحې او مکالمو د کیفیت سنجونې برخه کې د لوړ ظرفیت لرونکو وسایلو، تجهیزاتو، ظرفیت لوړونې برخو کې مرسته وکړي.
په ورته مهال په دې لیدنه کې د اترا ادارې عمومي مشر عمر منصور انصاري ویلي دوی سر له اوس نه د مرکزي ولایتونو د فریکونسۍ د مانیټورینګ او نظارت لپاره د تجهیزاتو برابرولو تابیا لري.
د ښاغلي انصاري په خبره هڅه به وکړي چې په ټولو برخو کې د همکارۍ په موخه د چک جمهوریت د مخابراتي خدمتونو د تنظیم له ادارې سره د همکاریو هوکړه باندې کار وشي.