تاند- د یوټیوب د ادارې ویندوی وايي، د امریکا د پخواني ولسمشر دونالډ ټرمپ د چاینل د ځنډولو موده یې نوره هم اوږده کړې ده.
د روانې جنورۍ په سر کې د امریکا د ولسمشرۍ د انتخاباتو پر پایلو د ټرمپ د نیوکو او وروسته د جنورۍ په دوولسمه د کانګریس پر ودانۍ د ټرمپ د پلویانو د برید په خاطر د امریکا ګڼو ټولنیزو رسنیو د ټرمپ اکاونټونه بند کړل؛ د دغو ټولنیزو رسنیو په منځ کې یوه هم یوټیوب وه.
د یوټیوب ویندوی وايي، د ټرمپ یوټیوب چاینل به تر نامعلومې مودې پورې بند وي څو نوموړی نوې ویدیو خپره نه کړای شي.
د یوټیوب د مسوولانو په وینا د دې پرېکړې دلیل دا دی چې ممکن ټرمپ په پاروونکو څرګندونو یو وار بیا خپل پلویان تاوتریخوالي ته وهڅوي.
فیسبوک او ټویټر هم د ټرمپ اکاونټونه د تل لپاره بند کړي دي.
خو یوټیوب وايي چې د ترمپ چاینل د تل لپاره نه بندوي، مګر اجازه نه ورکوي چې تر نامعلومې مودې پورې ټرمپ نوې ویدیو خپره کړي یا څوک د ده پر مخکینیو ویدیوګانو تبصره ولیکي.