تاند- لومړني کسان یا سیلانیان، چې په خپلو پیسو به فضا ته لاړ شي، د سې شنبې په ورځ اعلان شول.
د اسوشیتید پریس خبري اژانس د راپور له مخې، دا درې تنه نارینه دي او د سپېس ایکس په کپسول کې له یوه ستورمزلي سره فضايي تمځي ته ځي.
هر یو به د دې سفر لپاره ۵۵ ملیون ډالره کرایه ورکړي.
د ناسا یو ستورمزلی مایکل لوپز الګریا به، چې د اکسیم سپېس (Axiom Space) کمپنۍ لپاره کار کوي، دوی تر فضايي تمځي بدرګه کړي.
د اکسیم عمومي ريیس مایک سافردیني وايي«دا نړیوال فضايي تمځي ته لومړنی تجارتي سفر ګڼل کېږي.»
دوی به د راتلونکي کال په جنورۍ کې فضا ته لاړ شي او هلته به ۸ ورځې په فضايي تمځي کې تېرې کړي.