تاند (شنبه د دلوې ۴) ولسمشر اشرف غني د دوو جلاجلا فرمانونو په صادرولو سره د مالیې وزیر عبدالهادي ارغندیوال له دندې ګوښه او پر ځای یې محمد خالد پاینده ددغه وزارت د نوي سرپرست په توګه ټاکلی دی.
دا په نژدې یوه میاشت کې د نوې کابینې دویم وزیر دی چې د حکومت له لوري له دندې لرې کېږي.
تر دې وړاندې ولسمشر غني د عامې روغتیا وزیر جواد عثماني هم له خپلې وظیفې ګوښه کړی و.
د ولسمشرۍ ماڼۍ د چارو ادارې نن شنبه د یوې خبرپاڼې په خپرولو سره ویلي چې عبدالهادي ارغندیوال د ولسمشر د اوامرو او احکامو له منلو سرغړونه کوله، د اصلاحاتو د راوستو په برخه کې یې همکاري نه کوله، د مدیریت د کمزورۍ په تړاو یې د څېړنو اجازه نه ورکوله او دغه راز یې د نوموړي د ګوښه کولو لپاره ځیني نور دلایل هم ذکر کړي دي.
ښاغلی ارغندیوال د حکومت د نوې کابینې لومړی وزیر و چې د روان کال حمل میاشت کې د مالیې وزارت د سرپرست په توګه وګمارل شو.
د نوموړي په لرې کېدو سره چې کابو یوه میاشت وړاندې یې له ولسي جرګې د باور رایه تر لاسه کړې وه یو بل وزارت هم سرپرست ته وسپارل شو.
عبدالهادي ارغندیوال یا هم د هغه شاوخوا کسانو تر اوسه په دې هکله کوم څه نه دي ویلي.
د ارغندیوال په لرې کېدو سره دا شپږم وزارت شو، چې د سرپرست وزیر له خوا اداره کېږي.
تر دې وړاندې ولسمشر غني د عامې روغتیا وزیر محمد جواد عثماني هم چې د ولسي جرګې څخه یې د باور رایه اخیستې وه له دندې لرې او دغه وزارت یې سرپرست وزیر ته وسپاره.
دغه راز د پوهنې، ښځو چارو، د کلیو پراختیا او اطلاعاتو او کلتور هغه وزارتونه دي، چې نوماندانو یې له ولسي جرګې رایه تر لاسه نه کړه او تر اوسه د سرپرستانو له خوا اداره کېږي.