تاند (سه شنبه د جدي ۳۰) د افغانستان د بهرنیو چارو وزیر محمد حنیف اتمر په یو درې ورځني سفر سعودي عربستان ته رسېدلی.
د بهرنیو چارو وزارت له لوري په خپره شوې خبرپاڼه کې راغلي چې ښاغلی اتمر او ورسره پلاوی نن ماسپښین د سعودي جدې ښار ته ورسېد.
سعودي ته د نوموړي د سفر موخه د افغان سولې له پروسې د یاد هېواد لا ډېر ملاتړ او د دوه اړخیزو اقتصادي همکاریو پراختیا بلل شوې ده.
د خبرپاڼې د معلوماتو له مخې، اتمر به په یاد هېواد کې له خپل سیال شهزاده فیصل بن فرحان او یو شمېر نورو لوړپوړو سعودي چارواکو سره وګوري او د سولې د سیمه ییزې او نړیوالې اجماع په اړه به د هغوی ملاتړ خپل کړي.
بلخوا د اروپایي ټولنې د نړیوالې همکارۍ کمیشنرې ویلي چې اروپایي ټولنه د افغان سولې پروسې بشپړ ملاتړ ته دوام ورکوي.
د افغانستان د بهرنیو چارو وزارت نن سه شنبه په یوه بیان کې ویلي، جوتا اوپیلاینن دا څرګندونې نن له محمد حنیف اتمر سره په ټلیفوني مکالمه کې کړي دي.
د یاد وزارت د معلوماتو له مخې دواړو لوریو د افغان سولې پروسې پر روان بهیر، په دې برخه کې د وروستیو پرمختګونو او ځیني نورو اړوندو موضوعاتو په اړه خبرې کړي دي.
مېرمن جوتا په افغانستان کې وروستی تاوتریخوالی غندلی او ویلي یې دي چې اروپایي ټولنه به د افغان سولې پروسې بشپړ ملاتړ ته دوام ورکړي.
جوتا اوپیلاینن په افغانستان کې د تلپاتې سولې ټینګېدو لپاره په یو سراسري اوربند ټینګار کړی دی.