تاند(یکشنبه، د جدې ۲۸) د انرژۍ نړیوالې ادارې په یوه راپور کې ویلي، په نړۍ کې د ګلتوني ګازونو تولید کم شوی دی.
د کورونا وایرس له خپرېدو او د نړۍ په ګڼو سیمو کې پر تګ راتګ له بندیزونو وروسته، له فوسیلي سونګ موادو لکه تېلو څخه استفاده خورا کمه شوې او په نتیجه کې یې د ۲۰۱۹ کال په پرتله په ۲۰۲۰ کې ګلتوني ګازونه په سلو کې کابو ۷ کم شوي دي.
د انرژۍ نړیوالې ادارې دې حد ته د ګلتوني ګازونو کمېدل یو تاریخي ریکارډ بللی دی.
ګلتوني ګازونه د مځکې د تودېدا یو تر ټولو مهم سبب بلل کېږي.
نېچر ساینسي مجلې هم په وروستیو کې راپور ورکړ چې ښايي په ۲۰۲۰ م کال کې په نړۍ کې ګلتوني ګازونه د وړم کال په پرتله کابو ۳ اعشاریه ۳ ملیارد ټنه کم شوي وي.
د دغو ګازونو یو لوی دلیل دا بولي چې د کورونا وبا د خپرېدو له کبله د الوتکو الوت تر نیمايي کم شوی، له موټر او نورو نقلیه وسایلو تر پخوا کم کار اخیستل کېږي په دې ډول چې په ۲۰۲۰ کې د موټرو پلور په سلو کې ۱۴ لږ و.
خو له دې وقفې سره سره باور دا دی چې د کورونا وبا له ختمېدو سره سم به یو وار بیا د ګلتوني ګازونو خپرېدا د پخوا په شان زیاته شي.