تاند(شنبه، د جدې ۱۹) د کرنې وزارت وایي، د بڼوالۍ ځنځیري ارزښت د پراختیا سکټوري پروژې، د آسیایی پراختیا بانک، ADB په مرسته د لغمان ولایت په مهترلام ښار کې د مالټې او لیمو ۳۷ جریبه بڼونه جوړ کړي دي.
د کرنې وزارت د خبرپاڼې له مخې، په لغمان کې د بڼوالۍ ځنځیري ارزښت د پراختیا د سکټوري پروژې «HVCDSP» مسوول غزیز الرحمان جبارخېل وایي چې د ۱۳۹۹یم کال په ترڅ کې یې په لغمان ولایت کې د سټروسو ۳۷ جریبه بڼونه جوړې کړي دي.
ښاغلی جبارخېل وویل: «دغه بڼونه چې ۱۵ جریبه یې د لیمو او ۲۲ جریبه نور یې د مالټې دي په سوداګریزه بڼه د مهترلام بڼوالو ته جوړ شوي دي.
نوموړي زیاته کړې، په ۲۰۲۱م کال کې مو پلان دا دی، چې د لغمان ولایت په مهترلام ښار او قرغیو ولسوالۍ کې په ټولیزه توګه د سټروسو ۴۹ جریبه بڼونه او د خورماوو ۲۵ جریبه بڼونه جوړ کړو.
د کرنې وزارت په خبرپاڼه کې راغلي، په دغو بڼونو کې ۱۶ کسان کار کوي او د ورځې له پنځه تر لسو کسان په کې مزدوري کوي.
دا په داسې حال کې ده چې د لغمان د کرنې ریاست وايي چې په دې وروستیو کلونو کې یې د ۴.۵ زره جریبه بڼونه ایښي دي.