تاند (شنبه د جدي ۱۳) په افغانستان کې د ناټو او امريکايي ځواکونو عمومي قوماندان جنرال سکاټ مېلر له افغان پوځي چارواکو سره د امنيتي وضعيت په اړه خبرې کړې دي.
په افغانستان کې د غوڅ ملاتړ ماموریت وایي، په دې ناسته کې پر روان امنیتي وضعیت او د طالبانو له خوا د تاوتریخوالي زیاتوالي په تړاو خبرې شوې دي.
په افغانستان کې د امريکايي ځواکونو له لوري نن شنبه په خپره شوې خبرپاڼه کې راغلي چې ښاغلي مېلر د افغانستان له لوى درستيز جنرال ياسين ضياء، د کورنيو چارو وزير مسعود اندرابي، د ملي دفاع وزارت مرستيال شاه محمود مياخېل او د ملي امنيت لوى رئیس ضياء سراج سره ناسته کړې ده.
سرچینه زیاتوي، دواړو لوريو د امنيتي ارګانونو ترمنځ پر همغږۍ ټينګار وکړ، څو د سولې لپاره زمينه برابره شي.
دغه امریکايي چارواکي داسې مهال له افغان لوړپوړو چارواکو سره لیدلي چې په هېواد کې د ناامنیو په ځانګړي ډول د هدفي وژنو او چسپکي ماین چاودنو پېښې زیاتې شوي دي چې خلک یې خورا اندېښمن کړي.