تاند (یکشبه د قوس ۳۰) د افغانستان د ملي دفاع وزارت وايي، افغان ځواکونو د کندهار په څو ولسوالیو کې د طالبانو پر غونډو بریدونه کړي چې له امله یې ۸۹ وسله والو ته مرګ ژوبله اوښتې ده.
د ملي دفاع وزارت نن یکشنبه په یوه خبرپاڼه کې ویلي، طالبان د کندهار په ژېړۍ، ډنډ، پنجوايي او ارغنداب ولسوالیو کې راټول شوي و او د افغان امنیتي سرتېرو پر پوستو یې د بریدونو پلان درلود.
د خبرپاڼې د معلوماتو له مخې، امنیتي سرتېرو د هوايي او توپچي ځواکونو په ملاتړ د طالبانو پر دغه غونډو بریدونه وکړل چې ددې بریدونو په پایله کې ۷۴ طالب وسله وال وژل شوي او ۱۵ نور ټپیان دي.
سرچینه زیاتوي، په دې عملیاتو کې د طالبانو یوه اندازه وسلې او مهمات هم له منځه وړل شوي دي.
طالبانو تر اوسه په دې هکله څه نه دي ویلي.
د یادونې وړ ده چې په دې وروستیو کې یو ځل بیا په کندهار کې د افغان ځواکونو او طالبانو تر منځ جګړو زور اخیستی، چې له امله یې سلګونه کورنۍ بې ځایه شوي دي.
ددې جګړو له امله هره ورځ د درنې مرګ ژوبلې راپورونه ورکول کېږي او بې ځایه شوې کورنۍ بیړنیو مرستو ته اړتیا لري.
ولسمشر غني تېره ورځ د کندهار د امنیتي وضعیت ارزونې په موخه په یوه ویډیوي کنفرانس کې ددغه ولایت چارواکو ته د امنیت د ټینګښت او د طالبانو د بریدونو له امله له زیانمنو شویو کورنیو سره د مرستې کولو سپارښتنه وکړه.