تاند(چهارشنبه، د قوس ۲۰) د دایکندې د کرنې، اوبو لګولو او مالدارۍ ریاست چارواکي وایي، چې د لومړي ځل لپاره، د یوې مېرمنې له خوا په دایکندي کې د الوویرا کرکېله پیل شوه.
یاد چارواکي زیاتوي چې د لومړي ځل لپاره د نیلي ښار د ښځو شورا رییسې جمیله سلطانې له خوا په دې ولایت کې د الوویرا طبي بوتې د کرکېلي تجربه ترسره شوې ده.
د نوموړو په وینا مېرمن سلطاني له کابل څخه د الوویرا بزغلي وړې وه او په هغه شنه خونه کې، چې دا یې په خپل شخصي لګښت جوړه کړې ده کرلي دي.
د دایکندي د کرنې ریاست هم د مېرمن سلطاني د هڅوونې په پار ورته یوه شنه خونه جوړه کړې ده.
د دایکندي دکرنې ریاست زیاتوي، چې دایکندي د الوویرا کرکېلي لپاره مناسبه هوا لري.
الوویرا چې یو صنعتي او طبي بوټی دی، حاصلات یې لومړی ځل د افغانستان د تخار ولایت څخه کندوز او مزارشریف ته ورسېدل او تر هغه وروسته یې په تخار ولایت کې ښه حاصل ورکړ چې د بزګرانو پام یې ځان ته ور واړاوه.
که څه هم دا بوټی په افغانستان کې کم خلک پېژني خو هیلې دادي چې د حاصلاتو بازار به یې وغوړیږي.
څېړنو ښودلې چې د الوویرا عواید، له کوکنارو او آن له انجو هم ډېر دي، ځکه انجه له کرلو لږ تر لږه څلور کاله وروسته حاصل کوي، خو الوویرا د کال څلور ځله حاصل ورکوي.