تاند(شنبه، د قوس ۱۵) د امریکا د کانګریس غړیو له افغانستانه د نورو ځواکونو د ایستلو لپاره د ولسمشر ټرمپ د هڅو مخه نیولې ده.
کانګریس د ټرمپ حکومت مکلف کړی چې له افغانستانه د نور ځواکونه یوازې هغه مهال ایستلی شي چې د امریکا له متحدانو او د افغانستان له حکومت سره پرې همږغي وشي.
د امریکا په دفاع وزارت پورې اړوندې ورځپاڼې سټراز انډ سټرایپس راپور ورکړ چې د کانګریس غړیو د ملي دفاعي صلاحیت د قانون (National Defense Authorization Act) رامخکې کړی او په دې ذریعه یې له افغانستانه د امریکايي پوځیانو د ایستلو مخه ډب کړې ده. دا قانون وايي، مخکې تر دې چې پوځیان وایستل شي باید د حکومت د نورو ادارو نظرونه او مشوروې وغوښتل شي.
د روان ۲۰۲۰ کال په پیل کې په افغانستان کې د امریکايی پوځیانو شمېر ۱۳ زره وو خو اوس ۴۵۰۰ ته راکم کړای شوی دی. د ورځپاڼې پر اساس، ولسمشر ټرمپ هڅه کوي چې په افغانستان کې د امریکايي پوځیانو شمېر نور هم کم کړي او د امریکا د دې اوږدې جګړې د پای ته رسولو په اړه خپله هغه ژمنه عملي کړي چې د ۲۰۱۶ کال د انتخاباتو په کمپیان کې یې کړې وه.
سټارز انډ سترایپس لیکي، اوس داسې نه ښکاري چې تر کرسمیس پورې له افغانستانه د ټولو ځواکونو د ایستلو لپاره د ټرمپ غوښتنه عملي شي.
د ملي دفاعي صلاحیت قانون، چې د ۲۰۲۱ کال دفاعي بودجه ټاکي، کانګریس ته واک ورکوي چې د نورو ځواکونو د ایستلو لپاره تر هغو د پیسو اجازه ورنه کړي چې پنتاګون او نورو ادارو په دې اړه راپور نه وي وړاندې کړی چې په افغانستان کې د ځواکونو کمېدا به د امریکا پر امنیت او نورو مسلو څه اغېز ولري.
دا راپور په هغه صورت کې لارمي دی چې د ځواکونو شمېر تر ۴ زرو کمېږي.
په هغه راپور کې چې د پنجشنبې په ورځ خپور شو ویل شوي«حکومت قانوني مسوولیت لري چې په افغانستان کې د امنیتي عملیاتو د وضعیت او د دیپلوماتیکو هلوځلو په باب کانګریس او د امریکا خلکو ته په وخت، منظم او بشپړ معلومات ورکړي.
په همدې ورځ د امریکا سنا او استازو جرګې د دې لایحې پر وروستي نسخې موافقې ته ورسېدې.
په راپور کې راغلي چې امریکا له افغانستانه هغه مهال نور پوځیان ایستلی شي چې د امرکیا ناټو متحدان او د افغانستان حکومت موافق وي.
وړاندې ویل شوي چې د امریکا د ملي ګټو لپاره ضروري ده چې دا یقیني شي چې افغانستان به بیا د تروریستانو پر ځالې نه بدلېږي، امریکا به له دې درکه خوندي کېږي، د افغانستان له حکومت سره به د امریکا مشارکت نه زیانمن کېږي او د ښځو، نجونو او نورو افغانانو د حقونو لپاره په سخته ترلاسه شوې بریاوې به ساتل کېږي.