تاند ( شنبه، د قوس ۱۵) د هند او اسټراليا ترمنځ د ٣ نړيوالو شل اوريزو لوبو لړۍ د جمعې ورځ پيل شوه.
په لومړۍ شل اوريزه لوبه کې اسټراليا د لوبې پچه وګټله او لومړى يې هند ته د توپوهنې بلنه ورکړه.
هند په ټاکلو ٢٠ اورونو کې د ٧ لوبغاړو په سوځېدو ١٦١ منډې وکړې.
د هند لپاره کى ايل راهول ٥١ رويندرا جدېجا ٤٤ ناسوځېدلې، سنجو سمسون ٢٣ او هارديک پانډيا ١٦ منډې وکړې.
په دوهمه پاڼۍ کې د ١٦٢ منډو هدف پوره کولو لپاره د اسټراليا لوبډلې په ټاکلو ٢٠ اورونو کې د ٧ لوبغاړو په سوځېدو ١٥٠ منډې وکړې او د ١١ منډو په توپير يې په لومړۍ نړيواله شل اوريزه لوبه کې ماتې وخوړه.
د دوى له لوري ارون فنچ ٣٥ ډارسي شارټ ٣٤ او موسيس هينريکس ٣٠ منډې ترلاسه کړې.
د لوبې د غوره لوبغاړي جايزه يوژيندرا چاهل ته ورکړل شوه.
د اسټراليا او هند ترمنځ به دوهمه نړيواله شل اوريزه لوبه د دسمبر په ٦مه نېټه په سډني کې ترسره شي.