تاند ( جمعه، د قوس ۱۴) ټیک ټاک د خپلو کاروونکو لپاره په يو نوي مهم بدلون باندې کار روان کړى دى.
ډي ورج ورځپاڼې په يو راپور کې ليکلي چې د کوچنيو ويډيوګانو مشهور اپليکېشن ټیک ټاک مسوولان په دې اړه کار کوي چې د ويډيوګانو وخت زيات کړي.
دوی وایي چې دوى به د ويډيو وخت تر درې دقيقو پورې اوږد کړي او په ازمايښتي ډول يې دا کار روان کړى دى.
د ټیک ټاک له لوري د اوږدو ويډيوګانو دا اسانتيا اوس يوازې ځينو مشخصو ټک ټاک کاروونکو ته ورکړل شوې ده او د لومړۍ ازميښتي مرحلې څخه وروسته به د ټک ټاک مسوولان په دې اړه پرېکړه کوي چې دا اوس ټولو کاروونکو ته وړاندې کړي او که نه.
اوسمهال په ټیک ټاک کې زيات نه زيات د ١ دقيقې ويډيو خپرولو اجازه شته او همدا د ټیک ټاک ځانګړنه ده، ځکه د اوږدو ويډيوګانو لپاره د يوټيوب مشهوره وېبپاڼه شته چې ميليونونه ليدونکي لري.
ټیک ټاک د کوچنيو ويډيوګانو له امله ډېره مشهوره شوې ههم ده.
په دې کې خلک کولای شي نورو ته د دقيقو پر ځاى په ثانيو کې خپل پېغامونه ورسوي او د دې تر څنګ پکې جالبې ويډيوګانې هم په ثانيو کې خپروي، چې خلک يې ژر ګوري او ډېر وخت يې نه ضايع کېږي.
د ټیک ټاک شرکت د ٣ دقيقو ويډيوګانو په تړاو په رسمي ډول څه نه دي ويلي، خو هغه وېبپاڼې او خلک چې د ټېکنالوژۍ په نړۍ نظر ساتي، هغوى وايي چې ټک ټاک دا اسانتيا مشخصو خلکو ته ورکړې ده.