تاند- چینايي سپوږمکۍ چانګ۵، چې تېره اوونۍ سپوږمۍ ته استول شوې وه، له ۱۱۲ ساعته سفره وروسته پرون (یکشنبه) د سپوږمۍ مدار ته ورسېده.
کله چې ستوربېړۍ د سپوږمۍ ۴۰۰ کیلومترۍ ته ورلنډه شوه، د مدارچورلېدونکي ماجول انجن یې د ۱۷ دقیقو لپاره چالانه پاتې شو. د دې په نتیجه کې د ستوربېړۍ سرعت ښه کم شو چې د سپوږمۍ په جاذبه قوه کې جذبه شي.
دا کار د چانګ۵ ستوربېړۍ په ۲۳ ورځني ماموریت مهم ګام ګڼل کېږي.
ټاکل شوې ده چې دا ستوربېړۍ د دسمبر په منځویو کې د سپوږمۍ د خاورې نمونې مځکې ته راوړي.