تاند (دوشنبه د قوس ۳) د افغانستان د ملي امنیت پخواني رئیس رحمت الله نبیل د ولسمشر غني له خوا د پاکستاني بندیانو د خوشي کېدو په فرمان غبرګون ښودلی.

ښاغلي نبیل پر خپل ټوېټر لیکلي، ولسمشر اشرف غني په قدرت کې د پاتې کېدو لپاره، افغانستان ته د ستونزو د زیاتېدو سبب ګرځېدلی دی.

متاسفانه د طالبانو سر بیره، ډاکټر اشرف غني په قدرت کې د پاتې کیدو لپاره، افغانستان ته د ستونزو د زیاتیدو سبب ګرځيدلې، نه د ستونزو د کمیدو! مطمين يم چى اسلم فاروقى او په سلگونو پاكستانى تروريستان چی زمونږ د سلګونو هیوادوالو د شهادت سبب ګرځيدلې، آى اس آى ته په رشوت کی خوشی کیږی! https://t.co/snkcLntIMb

— Rahmatullah Nabil (@RahmatullahN) November 23, 2020

نوموړي زیاته کړې، ډاډه دی چې اشرف غني د داعش مهم غړي اسلم فاروقي په ګډون سلګونه نور پاکستاني جنګیالي چې د افغانانو قاتلان دي آی اس آی ته په رشوت کې خوشې کوي.

عبدالله اورکزی د اورکزیو ایجنسي اوسېدونکی دی او په اسلم فاروقي مشهور دی. هغه د داعش خراسان څانګې مسؤل دی چې افغان ځواکونو د روان کال په حمل میاشت کې نیولی وو.

پاکستان پخوا د هغه د خوشې کېدو غوښتنه کړې وه، چې دغه غوښتنه د افغانستان د بهرنیو چارو وزارت له خوا رد شوې ده.

ولسمشرۍ ماڼۍ د تېرې عقرب میاشتې په ۲۸مه د پاکستاني زندانیانو د خلاصون فرمان کړی دی او پکې ویل شوي چې دغه کار د ښه نیت او له پاکستان سره د دوستانه اړیکو د ټینګېدو په موخه شوی دی.

د پاکستان صدراعظم عمران خان تېره اونۍ کابل ته په یو ورځني سفر راغلی وو او له افغان چارواکو سره د ګډ لیدلوري په نوم یوه هوکړه لاسلیک کړه.

کابل ته د خان د سفر هدف د افغانستان او پاکستان تر منځ د دوه اړخیزو اړیکو پیاوړي کول او د سولې پروسه باندې خبرې کول بلل شوي دي.