تاند (چهارشنبه د عقرب ۲۸) چارواکي تاییدوي چې د فاریاب ولایت د قرمقول ولسوالۍ امنیه قوماندان صفر رییس بیدار په یوه بمي چاودنه کې وژل شوی دی.
د افغانستان په شمال کې د ۲۰۹ شاهین قول اردو له لوري په خپره شوې خبرپاڼه کې راغلي چې طالبانو تېره شپه په قرمقول ولسوالۍ کې پر امنیتي پوستو بریدونه وکړل.
د خبرپاڼې د معلوماتو له مخې، د مرستندویه افغان ځواکونو په رسېدو سره د طالبانو بریدونه مات او په جګړه کې ۶ طالبان وژل شوي او درې نور ټپیان دي.
سرچینه زیاتوي، د طالبانو له ماتې وروسته د قرمقول امنیه قوماندان د طالبانو په تعقیب پسې وتلي چې د ماین پرې چاودنه کړې او نوموړی پکې وژل شوی دی.
بلخوا یو شمېر سرچینو رسنیو ته ویلي چې طالبانو له تېرې شپې راپدېخوا د فاریاب په قرمقول ولسوالۍ بریدونه پراخ بریدونه پیل کړي او لا هم جګړه روانه ده.
ویل کېږي چې مارشال دوستم هم تېره شپه ناوخته له جوزجان څخه د فاریاب اندخوی ولسوالۍ ته تللی او د طالبانو پر ضد د جګړې سوق او اداره یې په لاس کې اخیستې ده.
د قرمقول ولسوالۍ وژل شوی امنیه قومندان د جنرال دوستم له نږدې او باوري کسانو څخه وو.
طالبانو تر اوسه ددې پېښې په تړاو څه نه ویلي.