تاند (یکشنبه د عقرب ۱۸) په لوګر ولایت کې د یوې ترافیکي پېښې له امله د خوست د اسماعیل خېلو مندوزیو ولسوالۍ پخوانی امنیه قوماندان وژل شوی دی.
دغه پېښه پرون ورځ د لوګر –ګردېز په لویه لاره د تېرې په سیمه کې رامنځ ته شوې ده.
د خوست د پولیسو ویاند عادل حیدر ویلي، په پېښه کې د خوست د اسماعیل خېلو مندوزیو ولسوالۍ پخوانی امنیه قوماندان وژل شوی او د تڼیو ولسوالۍ د ولسوال په ګډون درې تنه نور ټپیان شوي دي.
د نوموړي په وینا ټپیان روغتون ته د درملنې لپاره وړل شوي او روغتیايي حالت یې د ډاډ وړ دی.
د یادونې وړ ده چې وخت ناوخت د لویو لارو په اوږدو کې د موټر چلونکو د بې احتیاطۍ له امله ورته ترافیکي پېښې رامنځته کېږي، چې خلکو ته پکې مرګژوبله اوړي.