دا خبر بیا بیا تازه کېږي
د کندوز د حوزوي روغتون مسوولان وایي، د کندوز ولایت په مقام کې د چاودنې له امله د والي څلور ساتونکي وژل شوي او اته نور ټپیان دي.
تاند (یکشنبه، د عقرب ۱۱) راپورونه وايي چې د کندوز ولایت د مقام په انګړ کې چاودنه شوې ده او نامعلوم شمېر کسانو ته یې مرګ ژوبله اړولې ده.
د کندوز ولایتي ادارې تراوسه پورې د چاودنې د څرنګوالي او احتمالي مرګ ژوبلو په اړه څه نه دي ویلي.
لومړني راپورونه وايي چې چاودنه ماښام مهال وشوه او ورپسې د کندوز ولایت انترنیټ او مخابراتي شبکې پرچاو شوې.
یوې سرچینې د نوم د نه ښودلو په شرط تاند ته وویل چې شاوخوا ۱۶ تنو ته مرګ ژوبله اوښتې ده.
دې سرچینې وویل چې لا هم څوک نه پوهېږي چې چاودنه د اېښودل شوي بم په نتیجه کې وه او که انتحاري.
د دولت وسله والو مخالفانو هم تر دې دمه څه نه دي ویلي.