تاند ( چهارشنبه، د میزان ۲۳) د فاریاب امنیتي چارواکي وایي، چې تېره شپه د دې ولایت په ګرزیوان ولسوالۍ کې ناپېژاندو کسانو د یوې کورنۍ دغه دوه غړي وژلي دي.
د یاد ولایت د امنیه قومندانۍ ویاند کریم یورش وایي وژل شوي کسان زوی او پلار دي.
نوموړی زیاتوي وژل شوي کسان امنیتي ځواکونو ته د خوراکي موادو د ورکړې په تور په ډزو وژل شوي.
بل لور ته بیا د طالبانو ویاند ذبیح الله مجاهد رسنیو ته په استول شوي پیغام کې ویلي، چې دغه زوی او پلار د حکومتي ځواکونو له لوري په ډېرې بې رحمۍ وژل شوي دي.
طالبانو په دغه پېښه کې خپل لاس لرل رد کړي دي.
په دې وروستیو کې په ټول هېواد کې د نا امنیو پېښې زیاتې شوي چې عام خلک یې سخت اندېښمن کړي دي.