تاند ( چهارشنبه، د میزان ۲۳) د هلمند ځایي خبریالانو وایي، چې تېره شپه د دې ولایت په ناوې ولسوالۍ کې د افغان پوځ دوه چورلکې هغه مهال سره ټکر شوي چې، د جګړو ټپیان یې له یوې سیمې بلې ته لېږدول او د پوځ په اکمالاتو بوختې وې.
راپورونه وایي چې دواړو الوتکو تر لوېدو وروسته اور اخیستی دی.
تر اوسه د تلفاتو په اړه کره معلومات نه دي خپاره شوي او نه هم افغان حکومت تر اوسه په دې اړه څه ویلي دي.
خو ځايي خبریالان بیا د نا تایید شویو راپورونو له مخې وایي چې په پېښه کې پنځلس کسان وژل شوي دي.
بل لورته یو شمیر سرچینې وایي چې تېره شپه د لښکرګاه په شاوخوا کې د چاه انجیر په سیمه کې سخته جګړه شوې او تر سهاره پورې د درنو او سپکو ډزو غږونه اورېدل شوي دي.
تر دې دمه د تازه نښتو په اړه هم د هلمند ځايي چارواکو څه نه دي ویلي.
هلمند کې له تېرو څو ورځو راهیسې د افغان ځواکونو او وسله والو طالبانو ترمنځ نښتې روانې دي.