تاند(جمعه، د میزان ۱۸) د ناټو سرمنشي ینس سټولټنبرګ وايي، امریکا باید له افغانستان د خپلو ځواکونو د وتلو په تړاو له دې تړون سره سلا وکړي.
نوموړي ویلي، شرایطو ته په کتو به له افغانستان وځي.
د سټولټنبرګ دا خبرې له هغه وروسته دي چې د امریکا ولسمشر ډونالډ ټرمپ پرون وویل، له راتلونکي کریسمېس مخکې به له افغانستان خپل ځواکونه وباسي.
خو د ناټو سرمنشي وايي، افغانستان ته د تګ پرېکړه په ګډه شوې او د راتلونکو بدلونونو په هکله به هم پرېکړه په ګډه کوي.
د نوموړي په وینا، افغانستان ته د سپټمبر یوولسمې بریدونو د ځواب لپاره د ناټو ځواکونه تللي او دا د لومړي ځل لپاره د امریکا په خوښه په بهر کې د دې ټلوالې عملیات و.
سټولټنبرګ ویلي، په افغانستان کې د ځواکونو شتوالی او اوږدمهاله امنیت د ناټو د غړو هېوادونو په ګټه دی.