تاند(چهارشنبه، د میزان ۱۶) د ملګرو ملتونو سازمان ویاند په یوه خبري غونډه کې د خبرو پر مهال ویلي چې په سوریه کې اقتصادي وضعیت په شدیده توګه مخ پر ځوړ دی او دمګړی نږدې یوولس میلیونه وګړي بېړنیو بشري مرستو ته اړتیا لري.
د هغه په خبره که پر وخت اقدام و نه شي نو ښایي دوه میلیونه نور وګړي هم پر یاده شمېره ورزیات شي.
نوموړي همدا راز ویلي چې د خوړو نړیوال سازمان د راپور پر بنسټ دمګړی په سوریه کې نږدې ۹ میلیونه او پنځه سوه زره وګړي غذايي مصوونیت نه لري او دا مسئله د جدي اندېښنې وړ ده.
ملګرو ملتونو پر نړیوالو غږ کړی چې په سوریه کې د بشري ناورین د مخنیوي لپاره خپلې همکارۍ ډېرې کړي.