تاند(سه شنبه، د میزان ۱۵) نیویارک ټایمز راپور ورکړی دی چې امریکا په افغانستان کې د خپلو اډو نړولو بهیر پیل کړی دی.
راپور کې راغلي، امریکایي ځواکونو د کندهار هوایي ډګر په نامه د خپلې یوې پراخې پوځي اډې ورانول پیل کړي دي.
راپور کاږي، په کندهار کې د امریکایي ځواکونو د دې سترې اډې ځینې برخې ان په ۲۰۱۳ کال کې لا ویجاړې شوې او له دې داسې ښکاري چې امریکا هغه وخت لا په افغانستان کې د خپلو پوځیانو پاتې کېدو لپاره اوږدمهالی پلان نه لاره.
امریکایي ځواکونو په افغانستان کې خپلې ډېری اډې تر دې وړاندې افغان ځواکونو ته سپارلې دي خو د دوحې هوکړې تر لاسلیک کېدو وروسته یې د ویجاړولو په اړه راپورونه ورکول کېږي.
د یادونې ده چې څو ورځې وړاندې یوې پاکستانۍ ورځپاڼې راپور ورکړی و چې متحده ایالات په افغانستان کې د خپلو شاوخوا ۴۰۰ پوځي اډو ویجاړولو په حال کې دي.
امریکا داسې مهال دا اقدام پورته کوي چې په قطر کې د افغان حکومت او طالبانو ترمنځ د سولې د بین الافغاني خبرو یو مهم شرط د بهرنیو ځواکونو وتل دي.