تاند- د لومړي ځل لپاره څېړونکي د ګوتې د داسې نښو په اخیستلو بریالي شول چې هیڅکله جعل کېدای نه شي.
دا کار د نیویارک د پوهنتون څېړونکو کړی او وايي چې د انسان د لاس د ۵ ګوتو د رګونو درې بعدي یا تري ډي عکس اخلي چې جعل کېدا یې ناممکنه ده.
د ګوتو د نښو له جعل کېدو سره مقابله له ډېرو کلونو راهیسې روانه ده. خو اوس څېړونکي وايي چې د دې ستونزې تر ټولو ښه لار دا ده چې د نیویارک پوهنتون څېړونکو کشف کړې ده.
دوی د یوه درې بعدي سکن په وسیله د انسان د لاس د رګونو درې بعدي تصویر اخلي.
د دې سیستم له لارې اخیستل کېدونکې نښې دومره دقیقې او څرګندې دي چې د جعلکارانو لپاره د درغلۍ امکان نه پرېږدي.
د دې سیستم لپاره د توموګرافي فوټواکستیک په نوم له یوې ځانګړې ټکنالوژۍ کار اخیستل شوی دی. د لاس ګوتې پر یوه شیشه ایښودل کېږي، بیا د سکن د ماشینونو په شان لیزري وړانګې پر ګوتو لګېږي او د ګوتو د رګونو درې بعدي عکس اخلي.
دا سیستم پر ۳۶ تنو ازمویل شوی او نتیجه یې بریالۍ وه.
څېړونکي وايي چې د دې سیستم دقت په سلو کې ۹۹ دی. وروسته به دا سیستم ټولو دولتي او هغو ادارو ته وسپارل شي چې د ګوتو له نښو سره سروکار لري.
تراوسه پورې د دې سیستم د بیې او په دې اړه چې بازار ته به کله راووځي، څه نه دي ویل شوي.