تاند( سه شنبه د عقرب ۲۹مه) وروسته تر هغې، چې د امریکا ولسمشر جوباېډن اوکراین ته پر روسیې د لرې واټن توغندیو د ویشتلو اجازه ورکړه، په غبرګون کې د روسیې ولسمشر ولادیمیر پوتین د اتومي وسلو د کارولو نوی سند لاسلیک کړ.

په سند کې لیکلي، چې که یو غیراتومي هیواد د بل اتومي هیواد په مرسته پر روسیې برید وکړي، مسکو به دا برید د دواړو هیوادونو له لوري په ګډه وګڼي او د اتومي وسلې پر استعمال به فکر وکړي.

د کرملېن ویاند دمتري پیسکوف رسنیو ته ویلي، چې تر دې سند وروسته روسیه دا وړتیا مومي چې که چېرې پر روسیې یا بیلاروس د غیراتومي وسلو برید کېږي، پر وړاندې یې اتومي وسله وکاروي.

نوموړي تر دې مخکې هم د باېډن پرېکړ جګړې ته د لمن وهلو او په اړیکو کې شخړې او کشمکش زیاتولو په معنی یاده کړې ده.