تاند – د چین نوی جنګي الوتکه چې د (J-15D) په نوم یادیږي، په لومړي ځل په رسمي ډول د ګوانګ دانګ ایالت په ژوهای ښار کې عامو خلکو ته وښودل شوه. دا د دغو الوتکو څلورم نسل یا ورژن دی.
(J-15D) یوه دوه کسیزه جنګي الوتکه ده چې د الکترونیکي خنډ جوړولو یا پارازیت شیندلو د وړتیا ترڅنګ جنګي وړتیا هم لري. دا الوتکه په پرمختللې ټکنالوژۍ سمبال ده چې له رادار او توغندويي سیسټمونو سره د مقابلې وړتیا لري.
اټکل کیږي چې دا جټ به د دښمن د سینسورونو په ګډوډولو سره خپله بقا زیاته کړي او په عین حال کې د هوایي دفاع د ځپلو لپاره د یوې ځواکمنې وسیلې په توګه عمل کوي.
دغه الوتکه چې د “الوتونکې نهنګ” په نوم هم مشهوره ده، د شوروي د سوخو-۳۳ پر بنسټ جوړه شوې ده او دا مهال د چین په لیائونینګ او شاندونګ هوايي قطعو کې ځای پرځای شوې ده.
د پنتاګون د راپورونو له مخې، دا دوه کسیزه الوتکه په لیري فاصلو کې د بیړیو او د ځمکنیو بریدونو لپاره جوړه شوې او د معلوماتو راټولو لپاره د الکترونیکي تجهیزاتو وړتیا لري.