تاند (سې شنبه د میزان ۸) عبدالله عبدالله وايي، افغانستان په ټوله سیمه کې د سولې او ثبات غوښتونکی دی.
د ملي روغې جوړې عالي شورا رئیس ډاکتر عبدالله عبدالله چې نن یې د پاکستان د ستراتيژیکو مطالعاتو په انسټېټیوټ کې خبرې کولې وویل، د افغانستان حکومت سولې ته ژمن دی او تر څنګ یې د ترهګرۍ پر وړاندې خپله مبارزه جاري ساتي.
د ښاغلي عبدالله په خبره افغان حکومت یوازې په افغانستان نه، بلکې په ټوله سیمه کې د سولې او دایمي ثبات غوښتونکی او ملاتړی دی.
د ښاغلي عبدالله په خبره، هېچاته اجازه نه ورکوي چې له افغان خاورې څخه د ګاونډیو پر ضد ګټه واخلي.
هغه د خپلو خبرو پر دوام ویلي، د طالبانو د مذاکرااتي ټیم مشر ملا عبدالغني برادر ته یې مخامخ ویلي چې افغان جګړې ته د خبرو له لارې د پای ټکی کېږدي.
د ملي روغې جوړې عالي شورا رئیس ټینګار کړی، چې په افغانستان کې روانه جګړه یوازې د خبرو له لارې حل کېدی شي او ددوی او طالبانو تر منځ د سولې خبرې باید په پوره حوصله مندۍ سره مخته لاړې شي.