تاند ( سه شنبه، د میزان ۸) د افغانستان د پوهنې وزارت مسولان وايي، د کابينې د پرېکړې پراساس د دولتي ښوونځيو له لومړي ترلسم تولګيو کې هم حضوري زدهکړې د روانې میزان مياشتې په ۱۲مه نېټه پيلېږي.
د دغه وزارت وياندې نوريه نزهت وایي، د دوشنبې په ورځ د ولسمشرغني په مشرۍ د کابينې غونډې د پوهنې او عامې روغتیا وزارتونو ګډه غوښتنه ومنله، چې له مخې يې بايد د دولتي ښوونځيو په پاتې ټولګيو کې هم حضوري زدهکړې پيل شي.
هغې زياته کړه، دغه پرېکړه کې د مرکز او ولايتونو ټول ښوونځي شامل دي.
تر دې وړاندې کابينې د پوهنې وزارت د غوښتنې پر بنسټ د روان کال د تېرې سنبلې مياشتې په ۱۵مه نېټه د دولتي ښوونځيو په يوولسم او دوولسم ټولګيو او د خصوصي ښوونځيو ټولو ټولګيو کې د حضوري زدهکړو د پیل اجازه ورکړې وه.
تېر کال د حوت په مياشت کې له کورونا سره د مبارزې عالي کمېټې پرېکړه کړې وه چې، په ښوونځيو او پوهنتونونو کې دې حضوري زده کړې د یاد ویروس د لا خپرېدو له کبله نه پيلېږي.