تاند (یکشنبه د میزان ۶) عراق کې د امریکايي ځواکونو پر اکمالاتي کاروان د سړک غاړې ماین چاودنه کړې ده.
د رسنیو د راپورنو له مخې په دې پېښه کې امریکايي پوځیانو ته کوم زیان نه دی اوښتی، خو یو ټانک یې په مکمله توګه ویجاړ شوی دی.
راپورونه وايي په ټانک کې ټول بار تجهیزات له منځه تللي دي.
په عراق کې امنیتي سرچینو ویلي چې دا پېښه په ذیقار سیمه کې رامنځته شوې ده.
د راپورنو له مخې د روانې میاشتې له پیل څخه په عراق کې پر امریکایي اهدافو بریدونه یو ځل بیا ډېر شوي دي.
د راپورونو پر بنسټ په دې موده کې د امریکايي عسکرو شاوخوا ۳۰ ټانګونه د سړک غاړې په ماین چاودنو کې تخریب شوي دي.
امریکا ددې بریدونو پړه پر ایران اچولې ده او ویلي یې دي که دا بریدونه دوام پیداکړي نو په عراق کې به خپل سفارت وتړي.