زموږ په قوانينو کې خو چې څوک عامه نظم نه خرابوي او د وضع شویو قوانينو خلاف نه وي، د نظام پلویان وي، په ټاکنو کې فعاله برخه اخلي، د سولې پلویان وي او له هیواد څخه د دفاع په خاطر هرې سرښندنې ته چمتو وي.
زه خو فکر کوم چې د خپلو نظریاتو د اظهار حق لري، خیر که د ځينو نه خوښېږي.
که هسې وي خو ډير کسان شته چې د ډیرو نه خوښيږي. که څوک د خپلو کړنو ځواب ورکولی شي بيا نو ولې له خلکو ډارېږي. که چا غلط کار نه وي کړی، له حساب- کتاب هم ډار نه لري.
یو څه چې روښانه دي هغه دا دي چې د خلکو زور د خدای زور دی.
که خبره د ښه سړيتوب وي شیطان هم یو وخت ملایکه وه، خو اوس لوړې لوړې ماڼۍ لري.
د اساسي قانون په څلوردېرشمه ماده کې راغلي:
« د بيان آزادي له تېري خه خوندي ده. هــر افغــان حــق لــري چــې خپــل فكــر د ويــــــنا، ليكنـــې، انځور او يا نورو وسـيلو له لارې، په دې اسـاسـي قـانون كې د راغلو حكمونو په رعایت څرګند کړي.»
دغه راز د اساسي قانون په شپږدېرشمه ماده کې لولو:
«د افغانسـتان اتبـاع حـق لـري چـې د روا او سوله ييزو غوښتنو د تأمين لپاره لـه قــانون ســره ســم بــې وســلې غونـډې او مظاهرې وکړي.»
اساسي قانون چې د ټولو قوانینو مور ګڼل کېږي، خو د ټولو له پاره دی، څوک چی قانون نه مني، مانا دا چې نظام نه مني.
دا به څومره غیرمنصفانه وي که د اساسي قانون هغه برخې چې زموږ له طبعې سره برابرې وي، ومنو، خو نورې برخې یې رد کړو.
د محترم جنرال وزیري پر لیکنه لنډکی نقد:
((زموږ په قوانينو کې خو چې څوک عامه نظم نه خرابوي او د وضع شویو قوانينو خلاف نه وي، د نظام پلویان وي، په ټاکنو کې فعاله برخه اخلي، د سولې پلویان وي او له هیواد څخه د دفاع په خاطر هرې سرښندنې ته چمتو وي.
زه خو فکر کوم چې د خپلو نظریاتو د اظهار حق لري، خیر که د ځينو نه خوښېږي.))
ښاغلی دولت وزیری د خپل خیال و فکري ټال له بابته هر څه چې مخې ته یې راغلل، لیکې یې او تاند ته یې استوي؛ معمولآ د نورو کسانو ژباړل شوي اقوال را نقلوي، خپله خبره یا نه لري او یا هم بې پیونده او بې خونده وي.
پورتنۍ جملې یي خپلې دي، ځکه یې نقدوم.
د قانون د مندرجاتو له تفسیر څخه (د متقاعد جنرال) عاجزي ګناه نه ده، ځکه حقوقي فهم ته اړتیا لري. خو د نموړي ځاني (اټکلي) تعبیر په رسنیو کې کښل د تشویش وړ ځکه بولم چې ممکن ځني لوستونکي یې هو به هو، ومنې او ناسم پوهاوی را منځته کړي. جبران يې وخت ته اړتیا لري.
د نظریاتو د اظهار او اعلام حق نه په سرښندنه پوري مختص دی، نه په ټاکنو او نه هم په د نظام په پلوي او… پوري تړاو لري. اساسي قانون د افغانستان د ټولو اتباعو ګډ ملکیت دی. ورڅخه استفاده و حاکم نظام ته په وفاداري پوري مشروط نه دی. دغه ډول تفسیر د توتالیترو او استبدادي رژیمونو د پلویانو خصوصیات بیانوي.
هغه څه چې لیکونکی راته وایي، قانوني صبغه نه لري، نه هم د افغانستان اساسي قانون (څلور دیرشمې مادې) روحیه داسي مقاولې ته افغانان مجبوروي.
برسیره پردې، د اساسي قانون د یادي مادې، متن ناسم لیکل شوی: (( د بيان آزادي له تېري خه خوندي ده…))
د بیان د ازادي ښه و بد خوندیتوب په قانون کې نه لیکل کیږي، دې جملې ته ورته متن مې په اساسي قانون کې ونه موند.
ورپسې لیکونکی لیکي:
(( اساسي قانون چې د ټولو قوانینو مور ګڼل کېږي، خو د ټولو له پاره دی، څوک چی قانون نه مني، مانا دا چې نظام نه مني.))
دلته هم محترم جنرال په خپل اټکل کې خطاوتی دی. د قانون د یوې فقرې یا مادې نقض هیڅکله ددې په معنی نه دی، چې نقض کوونکی موجود حقوقي، عدلي یا دولتي نظام نه مني، بلکې تقصیر یې د اړوندي فقرې یا مادې تر نقض پوري محدودیږي.
محترم جنرال د شیطان و نسب او جنسیت ته هم اشاره کړې ده. هیڅ قرآني ایت نشته چې شیطان یې، «ملایکه» بللې وي، خو د کهف په سوره کې یې د جنیانو د جنس سره رابطه واضح بیان شوې ده.
ښاغلی متقاعد جنرال وزیری ډېر پړ ځکه نه بولم، چې مسلکي پوهه یې د مسکو د ټانک اکاډمۍ څخه د توپ او شوبلې د استعمال تر کچي پوري محصوره ده، ښه به وای که یې د خپل مسلک په تړاو لیکني تاند ته استولی، دملي اردو ځوانو پوځیانو ته به یې د تجربو او فهم بیان خامخا ګټور وو.
والسلام