تاند ( جمعه، د میزان ۴) د پاکستان لپاره د امریکا تازه ټاکل شوي سفیر د امریکا د مشرانو جرګې د بهرنیو اړیکو کمېټې ته ویلي، چې د امریکا او پاکستان ترمنځ همکاري په افغانستان کې د سولې او ثبات لپاره اړینه ده.
تاد زیاته کړې، چې په افغانستان کې سوله د دواړو هېوادونو په ګټه ده او دغې موخې ته د رسېدو لپاره د دواړو هېوادونو مرسته اړینه ده.
نوموړي ویلي، ټول هېوادونه په افغانستان کې د تلپاتې سولې لپاره ګډې ګټې پېژني او په خبره يې اسلام آباد د داسې شرایطو په رامنځته کولو کې کليدي رول لوبولی، چې د افغان حکومت او طالب مشرانو د سولې خبرو اترو تاریخي پیل ته يې لار هواره کړې ده.
هغه زیاته کړې دا د پاکستان لپاره یو فرصت دی، چې په سیمه کې نوی او غوره رول ولوبوي.
د پاکستان لپاره د امریکا تازه ټاکل شوي سفیر داسې مهال په افغان سوله کې د پاکستان او امریکا پر مرستې ټینګار کوي، چې په دوحه کې د طالب او افغان پلاوو ترمنځ له شاوخوا دوه اونیو بحثونو وروسته لاهم دواړه لورې د خبرو لپاره یوې هوکړې ته نه دي رسېدلي.