تاند(شنبه، د سنبلې ۲۲) ناټو وایي تمه لري چې مذاکرات په افغانستان کې د لسیزو جګړه ختمه کړي.
د ناټو عمومي منشي ینس سټولټنبرګ د بین الافغاني خبرو د پيل په مراسمو کې د ویډیو کنفرانس له لارې د خبرو پر مهال وویل ناټو د سولې د خبرو ملاتړ کوي خو دغه خبرې باید د افغانانو د دوو لسیزو لاس ته راوړنې وساتي.
د ناټو عمومي منشي همدا راز ټینګار وکړ چې دواړه لوري باید یوې هوکړې ته ورسېږي او وکړی شي چې دلته د لسیزو تاوتریخوالی پای ته ورسوي.
ناټو یو ځل بیا ټینګار کړی چې د افغانانو او افغانستان تر څنګ ولاړ دي او د افغان حکومت ملاتړ ته به ادامه ورکوي.
په همدې حال کې چین هیله څرګنده کړې ده چې پیل شوې خبرې د افغانانو د نېکمرغۍ لامل شي
د چین د بهرنیو چارو وزیر وانګ یې وایي، دوی د افغانانو په مشرۍ د سولې پروسې بشپړ ملاتړ ته ژمن دي.
نوموړي په قطر کې د بین الافغاني مذاکراتو د پیل مراسمو ته خبرو کې ویلي، هېواد یې غواړي پیل شوې بین الافغاني خبرې په افغانستان کې د روانې اوږدې خونړۍ جګړې د پای او د ټولو افغانانو د نېکمرغۍ لامل شي.
وانګ یې له افغانستان د بهرنیو ځواکونو وتلو ته په اشارې زیاته کړې، دا بهیر باید منظم او د افغانستان شرایطو ته په کتو ترسره شي.