تاند، شنبه د سنبلې ۲۲مه: ناټو وايي تمه لري چې د افغانانو خپلمنځي خبرې به په افغانستان کې روانه ۴۰ کلنه جګړه پای ته ورسوي.
د ناټو عمومي منشي ینس سټولټنبرګ د بین الافغاني خبرو د پيل په مراسمو کې د ویډیو کنفرانس له لارې د خبرو پر مهال وویل، ناټو د سولې د خبرو ملاتړ کوي خو په خبره یې دغه مذاکرات باید د افغانانو د دوو لسیزو لاس ته راوړنې وساتي.
سټولټنبرګ دغه راز په ټینګار سره وویل چې دواړه خواوې باید یوې هوکړې ته ورسېږي او وکړی شي چې په افغانستان کې د لسیزو تاوتریخوالی چې قربانیان یې عام افغانان دي پای ته ورسوي.
ناټو د تېر په څېر وايي چې د افغانانو او افغانستان تر څنګ ولاړ دي او د افغانستان حکومت ملاتړ ته به دوام ورکوي.
ناټو تر دې وړاندې هم څو څو ځلې ویلي چې د افغان حکومت او افغانانو ملاتړ ته به دوام ورکوي او یواځې به یې نه پرېږدي.