تاند(شنبه، د سنبلې ۲۲) په هرات ولایت کې د یو جومات پر لمونځ کوونکو خونړی وسله وال برید شوی دی.
تیره شپه په هرات ولایت کې نامعلومو وسله والو د جبرييل په ښارګوټي کې په جومات وسله وال برید وکړ.
د هرات ولایت د والي ویاند رسنیو ته ویلي دي چې تیره شپه نامعلومو وسله والو د جبرییل ښار ګوټي کې د جومات پر لمونځ کوونکو ډزې وکړي چې په نتیجه کې درې تنه لمونځ کوونکو ژوند د لاسه ورکړ او ۶ تنه نور ټپیان شوي دي.
ویاند ویلي دي چې برید د موټر سایکل سپرو وسله والو لخوا شوی دی.
ویل کیږي برید کوونکو د جومات پر لمونځ کوونکو پداسې حال کې برید وکړ چې د لمانځه نه وروسته د جومات نه د راوتو په حال کې وو.
د برید مسئولیت تر اوسه پورې چا په غاړه ندی اخیستی.
د هرات امنیتي ځواکونو هم تر اوسه پورې ددې پیښې په تړاو څوک ندي نیولي، خو ویلې یې دي چې د برید په اړه تحقیقات پيل شوي دي.