تاند، چهارشنبه د سنبلې ۱۹مه: د افغانستان د سوداګرۍ او پانګونې اداره وايي په هېواد کې د خراب امنیتي وضعیت، فساد او سختې پالیسۍ له امله پانګه د وېستو په حال کې ده.
ددې ادارې رئیس سید زمان هاشمي وايي، د سیمې ځینو هېوادونو د افغان پانګوالو د جذب لپاره ځانګړي سهولتونه او اسانتیاوې برابرې کړي دي، چې له همدې امله ډیری پانګوال تر افغانستان هماغه هېوادونه ګټور ګڼي.
نوموړی وايي په هېواد کې امنیتي ستونزې، د پانګې نه خوندیتوب، د بریښنا نشوالی او فساد هغه څه دي چې پانګوال یې دغه کار ته مجبور کړي دي.
هغه زیاتوي ددغو مسایلو سره سره د پانګونې برخه کې نوي قوانین رامنځته کېږي او ورځ تر بلې سختي زیاتېږي، نو ځکه پانګوال باندنیو هېوادونو ته زړه ښه کوي.
د ښاغلي هاشمي په خبره ترکیه او ازبکستان هغه هېوادونه چې په دې وروستیو کې یې د افغان پانګوالو پام ځانته جلب کړی دی.
افغان پانګوالو په داسې مهال بهرنیو هېوادونو کې پانګونې ته زړه ښه کړی، چې په هېواد کې د ننه زرګونه خلک بې کاره دي او له حکومت او پانګوالو څخه غواړي چې ورته کاري فرصتونه برابر کړي.