تاند ( سه شنبه، د سنبلې ۱۱) د هندوستان پخوانی ولسمشر پراناب موکرجي د ورپېښې ناروغۍ له کبله ومړ.
هندي رسني وایي، چې نوموړي تېره ورځ د هند په یو روغتون کې ساه ورکړه.
راپورونه وایي، چې پراناب موکرجي د زړه په ناروغۍ اخته او درې ورځې په روغتون کې بستر و، چې د دوشنبې په ورځ په ۸۴ کلنۍ کې ومړ.
بل لورته افغان ولسمشر محمد اشرف غني هم د نوموړي پرمړینه خواشینې ښودلې ده.
ولسمشرۍ ماڼۍ په یوه خبرپاڼه کې پراناب موکرجي د افغانستان له ښو ملګرو یاد کړی او ویلي، چې
د افغانستان په اړه یې ښه نیت درلود.
خبرپاڼه د ولسمشر غني له قوله لیکي: « زه په داسې حال کې، چې په دې لوی غم کې د هند له خلکو سره ځان شریک بولم، د افغانستان د حکومت او خلکو په استازیتوب د هند ولسمشر، لومړي وزیر، د هند خلکو او د پراناب موکرجي کورنۍ ته د تسلیت او همدردۍ مراتب څرګندوم»
پراناب موکرجي په ۲۰۱۲ کال کې د هند ولسمشري کړې ده.