تاند(جمعه، د سنبلې ۷) په کندهار ولایت کې درې تنه بریدګر د امنیتي ځواکونو لخوا ووژل شول.
د کندهار ولایت د امنیه قومندانۍ وياند جمال ناصر بارکزي رسنیو ته وویل چې نن ماسپښين شاوخوا ۲ بجې د کندهار ښار د اوومې امنیتي حوزې په سیمه کې ۳ وسله والو د پولیسو پر ګزمه برید وکړ.
د بارکزي په خبره چي د یادې حوزې د پولیسو په ځوابیه ډزو کې ۳ واړه بریدګر وژل شوي او پولیسو ته کوم زیان نه دی اوښتی.
په کندهار ولایت کې وخت ناوخته دا ډول پېښې ترسره کېږي، چې خلک يې اندېښمن کړي او له امنیتي چارواکو یې د مخنیوي غوښتنه کوي.
یاده پیښه داسې مهال رامنځ ته کیږي چې، نن سهار د کندهار په سپین بولدک ولسوالۍ کې د دوو چاودنو له امله ۱۳ ملکي وګړي ووژل شول او درې تنه نور هم ټپیان شول.