تاند(جمعه، د سنبلې ۷) يو شمېر نوموتو افغان کرېکټ لوبغاړو په هېواد کې د وروستیو اورښتونو او سېلابونو له قربانيانو سره د مرستې اعلان وکړ.
په دې ډله کې راشدخان، محمدنبي او نجيبالله ځدراڼ شامل دي. دوی د هغې افغان لوبغاړو له ډلې دي چې د افغانستان د ملي لوبډلې تر څنګ په نړيوالو ليګونو کې هم لوبېږي او پر خپلو بې سارو لوبو یې نړيوال حيران کړي دي.
د افغانستان کرکټ ملي لوبډلې غړي او د نړۍ لومړۍ درجه توپ اچوونکي راشدخان پر خپل ټوېټر ليکلي، دوی په افغانستان کې د سېلابونو له کبله په وروستيو ځاني او مالي زيانونو سخت خواشيني شوي او ټاکل شوې ډېر ژر د قربانیانو له کورنيو سره مرستې وکړي. راشدخان دغه راز پر نورو هم غږ کړی چې افغانستان کې له سېلاب ځپلو سره مرسته وکړي.
د راشدخان تر څنګ محمد نبي او نجیبالله ځدران هم اعلان کړی چې هېواد ته له ستنېدو سره سم به د سېلابونو له قربانيانو سره مرسته وکړي.
دغه درې واړه لوبغاړي اوس مهال د ويسټ انډيز کرکټ په غوره ليګ کې لوبېږي. د دوی تر څنګ مجيب الرحمن او نوين الحق هم سږ کال د دغه ليګ برخه دي او يو شمېر نور افغان لوبغاړي بيا چې دې ليګ کې اخيستل شوي وو، د ويزو د نه ترلاسه کولو له کبله له سږني فصل پاتې شول.
د يادولو ده چې وروستيو اورښتونو د افغانستان په بېلابېلو ولايتونو کې شاوخوا ۱۵۰ تنه ووژل او ګڼ نور يې ټپيان کړل. دغه راز شاوخوا ۲۰۰۰ کورونه ويجاړ شوي او پراخې کرنيزې ځمکې يې تخريب کړې دي.