تاند، سه شنبه د سنبلې ۴: د افغانستان د پلټنې ادارې د دوو ولایتونو هرات او نورستان پخواني او د بدخشان او میدان وردکو ولایتونو اوسني والیان لویې څارنوالۍ ته ور معرفي کړي دي.

د پلټنې ادارې ویاند فېروز بشري وايي د څېړنو په پایله کې یې د کرونا لپاره د ځانګړې شوې بودجې د ناسم مدیریت له امله یاد چارواکي د نورو څېړنو لپاره لویې څارنوالۍ ته ورپېژندلي دي.

د بشري په خبره د پلټنې ادارې د ولسمشر غني په امر د کرونا لپاره د ځانګړې شوې بودجې په برخه کې د شوي فساد له امله دغه تحقیقات تر سره کړي دي.

د هغه په خبره ددې تحقیقاتو په پایله کې د هرات او نورستان پخواني او د میدان وردک او بدخشان اوسني والیان په دغه فساد تورن پېژندل شوي دي.

په افغانستان کې د کرونا له خپرېدو وروسته حکومت د پلازمېنې کابل په ګډون ټولو ولایتونو ته له کورونا سره د مبارزې لپاره بودیجه ځانګړې کړه چې په دې برخه کې د پراخ فساد راپورونه ورکړل شول.

د پلټنې ادارې ویاند د خپلو خبرو پر دوام ویلي چې د دې کسانو په هکله به لا ډېرې څېړنې لویه څارنوالي وکړي.

باید وویل شي چې د پلټنې ادارې پرون دوشنبه د عامې روغتیا د پخواني وزیر په ګډون ددې ادارې درې پخواني او یو اوسنی مرستیال هم د فساد په تور لویې څارنوالي ته ورمعرفي کړل.

https://taand.net/%d8%af-%d8%b9%d8%a7%d9%85%db%90-%d8%b1%d9%88%d8%ba%d8%aa%db%8c%d8%a7-%d9%be%d8%ae%d9%88%d8%a7%d9%86%db%8c-%d9%88%d8%b2%db%8c%d8%b1-%d8%a7%d9%88-%d8%af%d8%af%db%90-%d8%a7%d8%af%d8%a7%d8%b1%db%90-%db%b4/