تاند(جمعه، د اسد ۲۴) د ارزګان د امنیتي وضعیت ارزونې په هدف له کابله د سیمه ییزو ارګانونو د خپلواکې ادارې رییس شمیم خان کټوازي په مشرۍ یو لوړ پوړی پلاوی مرکز ترینکوټ ته رسېدلی.
له شمیم خان کټوازي سره په دغه پلاوي کې د ملي دفاع وزارت لوی درستیز معاوین ډګر جنرال محمد شعیب، د کورنیو چارو وزارت د تعلیماتو معین محمد انور بریپال او یو شمېر نورو چارواکي او د ولس استازي برخه لري.
د سيمه ييزو ارګانونو د خپلواکې ادارې مشر شميم خان کټوازي پرون په یوې خبري ناسته کې خبریالانو ته وویل چې د ولسمشر محمد اشرف غني په هدايت او د ارزګان د خلکو په غوښتنه دغه ولایت ته په سفر راغلی، نوموړي وايي، ارزګان ته يې د سفر هدف د شته ستونزو حل کولو او د اړتيا پرمهال د چارواکو په دندو کې تغير راوستل دي.
ارزګان ته دا لوړ پوړی دولتي پلاوی داسې مهال سفر کوي چې د ولایتي شورا او ځایي خلکو په خبره په دې ورستیو کې ددغه ولایت په مرکز ترینکوټ او والسوالیو کې د وسلهوالو طالبانو تحرکات او بریدونه ډېر شوي، چې دوی یې له ستونزو سره مخ کړي دي.