نازدانه انکار یې داسې د خوږو خبرو منځ کې
لکه تت اور چې بلیږي د سرو سپینو زرو منځ کې
بیا به څومره معصوم زړونه دسلګیو له تیغ تیرشي
یوه ارزو په کمین ناسته د نظر د زغرو منځ کې
زه هغه اوس د ژوند داسې مرحله کې سره اوسو
لکه مات چې اعتماد وي د سنګر ملګرو منځ کې
په بې فکره کورنۍ کې یو شاعر یم ژوند مې داسې
لکه سور ګلاب ولاړ وي د کږو ډبرو منځ کې
د زګروي اواز یې اورې؟ستا جلان دی راشه راشه
لکه ژوبل مرغه ناست دی د زخمي وزرو منځ کې
————————————————
ور دې د زړه کړلو دربند د ننه کیناستلې
اوس تیره وه یوازې ژوند د ننه کیناستلې
ته دې د خپل ښایست په دنګو غرو مغروره ګرځه
زه به له درده اخلم خوند دننه کیناستلې
زما او ستا د یو کیدو امکان بس داسې ګڼه
لکه د اور اوبو پیوند دننه کیناستلې
اوس مې وجود د ژرندې پل د غم په لواړو دانو
دا دی درګرده وهي شخوند دننه کیناستلې
د اور کړیو کې جلان بند په بند داسې بند شو
لکه بنګړیو کې مړوند دننه کیناستلې
سیدجیلاني جلان