تاند (سه شنبه، د اسد ۲۱) د کورنیو چارو سرپرست وزیر مسعود اندرابي پرون دوشنبه د هرات له یو شمېر اوسېدونکو سره په لیدنه کې وویل چې د هرات د پولیسو په تشکیل کې به درې امنیتي حوزې او دوه د اور وژنې مرکزونه زیات کړي.
د کورنیو چارو وزارت دغه اقدام په هرات کې د ښه امنیت د ټینګښت په موخه په پام کې نیولی دی.
تر دې وړاندې د هرات خلکو په دغه ښار کې د نا امنۍ له زیاتېدو شکایتونه کړي وو.
په همدې حال کې د کورنیو چارو وزارت ویاند طارق آرین په خپله ټوېټر پاڼه لیکلي چې مسعود اندرابي د هرات له یو شمیر مشرانو سره په لیدنه کې ویلي چې په دغه ولایت کې د “امنیتي تړون” پلان پلي کول به ډیر ژر پیل شي.
بلخوا د کورنیو چارو سرپرست وزیر وویل چې په هرات کې به د جرمونو په کمولو، د لویو لارو او د دغه ولایت د ولسوالیو پر امنیت تمرکز وکړي.
د آرین په خبره اندارابي ژمنه کړې چې د هرات د پولیسو په تشکیل کې به درې حوزې او دوه د اور وژنې مرکزونه زیاتوي.
هرات اوسمهال ټولټال ۱۲ امنیتي حوزې لري.