رفيع الله مندوخېل، اسلام اباد
د زمري، اسد ۲۰ مه ۱۳۹۹
ډیورند کرښې ته نژدې په چمن کې چاودنې پنځه ويشت تنو ته مرګ ژوبله اړولې ده. چاودنه د نشه يي توکو پر ضد د ادارې موټر ته څېرمه شوې، او مسووليت يې وسله والو طالبانو منلی دی.
د چمن يوه دولتي چارواکي زکاوالله دراني د دوشنبې په ورځ ويلي چې چاودنه د ښار پر مال سړک په موټرسايکل کې د ځای پرځای شوو چاودېدونکو توکو په واسطه شوې ده او کېدای شي، د بريد هدف هم د ادارې موټر و، چې په کې سپرو کسانو ته هم مرګ ژوبله اوښتې ده. د چاودنې له امله شاوخوا ولاړ موټر، موټرسايکلونواو پلورنځيو ته هم زيان اوښتی دی.
له چاودنې وروسته د سيمې پوليس او د سرحدي ملېشې سرتېري د پېښې ځای ته رسېدلي او په اړه يې تحقيقات پيل کړي دي.
چارواکی زياتوي، چاودنه پر مال سړک د موبايل مارکيټ مخ ته شوې، چېرې چې وړاندې هم په وار وار چاودنې شوې دي. د روان کال په مارچ مياشت کې په چمن کې د ليويزپوليسو دفتر ته نږدې په چاودنه کې نهه کسان وژل شوي وو او په اپريل مياشت کې بيا د کلاعبدالله په توبه اڅکزي سيمه کې په بمي چاودنه کې د امنيتي ځواکونو دوه سرتېري وژل شوي وو.
صدراعظم عمران خان پر خپله ټويټر پاڼه د بريد غندنه کړې او د ولسي خلکو پر وژنه يې ژور خفګان څرګند کړی دی. د بريد مسووليت د وسله والو طالبانو الاحرار ډلې منلی دی.